إحنا مش ولاد ناس اوي كده

 
 

حدوته ربع ساعه في العيد
نزلت من البيت و ركبت الميكروباص اللي بيروح التحرير من ادام بيتنا …قاعده جنب السواق لوحدي حاطه السماعات في ودني و شعبي اف ام شغاله و الحياه حلوه و فجآه لقيت سواق الميكروباص بيقول بصوت عالي …اقفلي الشباك اللي جنبك يا آنسه
يا كل الحريم اللي في العربيه …اللي قاعده جنب الشباك تقفله !
شلت السماعات من ودني و سألته خير يا اسطي ..هو فيه حاجه هنا ! قالي هتشوفي دلوقتي .
عند جنينه الحريه اللي قدام الباب الرئيسي لﻷوبرا بدأت المهزله ..الرصيف كله شباب زحمه لدرجه انهم ماشيين وسط العربيات …بيرشوا ميه عالعربيات و بيشدوا البنات اللي في العربيات من شعرهم و يجروا !
علي نفس الرصيف واقف اتنين لابسين شرطه و تقريبا مذبهلين أو مكبرين دماغهم و واقفين بيشربوا شاي
الحمد لله عدينا مرحلة الخطر و وصلت عبد المنعم رياض …حطيت السماعه في ودني و عديت الشارع لناصيه محمود بسيوني و انا بقول لنفسي مش هاسمع اللي هيقول كلام سافل لكن اللي هيمد ايده هافشخه !
وصلت لناصية محمود بسيوني لقيت بنت متزيدش عن 14 – 15 سنه و في ايدها بنت اصغر يمكن 8 سنين واقفه بتزق واحد برضه ميزيدش عن 16 سنه و شويه صبيان عرر من نفس السن بيشدوها من ايدها و يحسسوا علي ضهرها وهم بيستعبطوا و بيقولولها خلاص بقي اهو عرف غلطته !
دخلت في وسطهم و حطيت ايدي علي كتفها و شدتها جوه ناصيه شارع جانبي وانا بقولهم اللي هيجي جنبها هاحبس دين أمه …نصهم جري و النص التاني قعد يضحك !
مشيت جنبي و لقيتها بتقولي شكرا يا آنسه …ده ماشي ورايا بقاله كتير و عمال يقولي انتي عامله شعرك فين و انا مبردش ..راح شاددني من شعري !
قولتلها عارفه شكله ولا ﻷ .. تعالي شاوريلي عليه و ناخده نعمله محضر
لقيت نظره غريبه في عينيها مقدرتش افسرها غير لما نطقت و قالتلي قسم إيه يا استاذه …ﻷ مش لدرجه قسم …إحنا مش ولاد ناس اوي كده .
بغض النظر عن ‫#‏التحرش‬ وقلة اﻷدب و المواقف الخرا اللي اتعودنا عليها
تخيل انت ان فيه بنت عندها 15 سنه عارفه و فاهمه و مؤمنه ان الحكومه متجيبش غير حقوق ولاد الناس
و برضه يبقي عندها نفس القدر من المعرفه و الفهم و الإيمان انها مش بنت ناس عشان حد يجيبلها حقها
حد يا جماعه متخيل القهره ! ‫#‏عمار_يا_مصر‬ .

Advertisements