‫#‏تنويه_هام_جداً‬

في سنة 2004 كسدت الخدمة عندنا في العمل فا درت دراسة سريعة و تطوعية على طوبوات المجاري اللي تصب في بحر طرابلس في المنطقة الممتدة من الميناء الى الريجاتا و الهدف من الدراسة اني بنعرف وين في بحر نظيف باش الواحد ممكن يمشيله و إكتشفت ان مافيش اي مكان نظيف ….

– الطوبو الاول بحدا مجمع ذات العماد ..
– الطوبو الثاني و هو أكبر طوبو و الاكثر تلويث للبحر و مكانه قدام قاعة الشعب …
– الطوبو الثالث بحدا قرية غرناطة و فندق الشاطئ سابقا …
– الطوبو الرابع في القراقشة بحدا جبانة سيدي حامد
– الطوبو الخامس في ابو نواس بالقرب من مصيف ابونواس
– الطوبو السادس في السياحية في امتداد شارع جامع بدر
– الطوبو السابع بحدا معسكر الاذاعة و قريب من المدينة السياحية

الغريب ان في الالاف من الناس مستمتعة بالسباحة في المصيف البلدي اللي جاي بين طوبو قاعة الشعب او طوبو مجمع ذات العماد و تلقاهم من الصبح لليل غادي يعوموا في المجاري و بعدين يقولوا خيره الشعب كله مريض و يعاين في تونس ….
و المشكلة ان بالاضافة للمخلفات العضوية في مخلفات ثانية زي الادوية و المنظفات و الاتشيدوا و الوركينة و اي حاجة الناس يصبوا في التصريف ….

اني مش متأكد بس اعتقد ان مياه المجاري تصب مباشرة زي ما هي و مش مخدومة في محطات التنقية – لان طرابلس ما فيهاش الا محطة تنقية وحدة اللي موجودة في الهضبة و ما انظن انها تخدم .

بشار شقليله

‫#‏تنويه_هام_جداً‬

Advertisements